កណ្ដាល ៖ ខ្មាន់កាំភ្លើងមិនស្គាល់មុខ៣នាក់បានបើកការបាញ់ប្រហារដោយអាវុធវែង ចំនួន៩គ្រាប់ បណ្ដាលឲ្យថៅកែចិញ្ចឹមទាយកពង ២នាក់ប្តីប្រពន្ធស្លាប់ភ្លាមៗខណ:កំពុងដេកនៅលើគ្រែដេកក្រោមផ្ទះ ហើយជនសង្ស័យបានគេចខ្លួន បង្កឲ្យភ្ញាក់ផ្អើលយ៉ាងខ្លាំង នាវេលាម៉ោង៣ទាបភ្លឺថ្ងៃទី១២ ខែសីហា ឆ្នាំ២០២៣នេះ នៅចំណុចក្រោមផ្ទះជនរងគ្រោះស្ថិតនៅភូមិថ្មី ឃុំសន្លុង ស្រុកខ្សាច់កណ្តាល ខេត្តកណ្តាល។
បើតាមរបាយការណ៍របានគរបាល ជនរងគ្រោះ២នាក់ន្តីប្រពន្ធមាន ឈ្មោះ ម៉ុច ម៉ៅ ភេទប្រុស អាយុ៤៧ឆ្នាំជនជាតិ ខ្មែរ មុខរបរចិញ្ចឹមសត្វទា និងលក់ចំណីសត្វ មានទីលំនៅភូមិឃុំកើតហេតុ(ស្លាប់នៅកន្លែងកើតហេតុ) និងឈ្មោះ គល់ ហ៊ាន់ ភេទស្រី អាយុ៤៥ឆ្នាំ ជនជាតិខ្មែរ (ត្រូវជាប្រពន្ធស្លាប់នៅកន្លែងកើតហេតុ)។
នៅកន្លែងកើតហេតុ សមត្ថកិច្ចរកឃើញវត្ថុតាងរួមមាន៖ សំបកគ្រាប់កាំភ្លើងចំនួន០៩គ្រាប់ និងក្បាលគ្រាប់កាំភ្លើងចំនួន០៣គ្រាប់ ។
តាមសមត្ថកិច្ចបញ្ជាក់ថា ជនសង្ស័យមានចំនួន៣នាក់ (មិនស្គាល់អត្តសញ្ញាណ) ១នាក់ស្លៀកពាក់អាវយឺតដៃខ្លី ពណ៌ ប៉ារ៉ា ពាក់មួកស៊ីវិល(ឆាង) និង២នាក់ទៀតមិនច្បាស់។
យោងតាមរបាយការណ៍ដដែលបញ្ជាក់ដំណើររឿងថា នៅថ្ងៃទី១១ ខែសីហា ឆ្នាំ២០២៣ វេលាម៉ោងប្រហែល១០យប់ ជនរងគ្រោះទាំង០២នាក់ប្តីប្រពន្ធ បានចូលទៅសំរាន្តនៅលើគ្រែក្រោមផ្ទះរបស់ខ្លួនដូចសព្វដង ចំណែកឯឈ្មោះ ស៊ាន់ សេងហ័ង ភេទប្រុស អាយុ១៩ឆ្នាំ ត្រូវជាកម្មករដើរប្រមូលពងទាក៏ដេកនៅលើគ្រែមួយទៀតក្បែរគ្រែជនរងគ្រោះចំហ៊ាងខាងលិច។
ចំណែកឯកូនរបស់ជនរងគ្រោះឈ្មោះ ម៉ៅ ម៉ាច ភេទប្រុស បានដេកនៅក្នុងបន្ទប់ជាមួយប្រពន្ធបន្ទប់ក្បែរគ្រែជនរងគ្រោះចំហ៊ាងខាងជើង និងកូនប្រុសរបស់ជនរងគ្រោះម្នាក់ទៀតឈ្មោះ ម៉ៅ ឧត្តម បានដេកនៅលើផ្ទះជាមួយប្រពន្ធ។
លុះដល់វេលាម៉ោង ៣:២០ទាបភ្លឺស្រាប់តែមានជនសង្ស័យ៣នាក់ មិនស្គាល់អត្តសញ្ញាណបានចូលមកបាញ់ជនរងគ្រោះទាំង០២នាក់ប្តីប្រពន្ធ បណ្តាលឲ្យស្លាប់នៅកន្លែងកើតហេតុតែម្តង។
ករណីខាងលើនេះកម្លាំងសមត្ថកិច្ចខេត្ត ស្រុក និងប៉ុស្តិ៍នគរបាលកំពុងចុះពិនិត្យ និងស្រាវជ្រាវស្វែងរកជនសង្ស័យមកអនុវត្តន៍តាមនីតិវិធី៕
