ប្រធានគោលដៅអនុវត្តច្បាប់ចរាចរណ៍ផ្លូវគោកម្នាក់ នៅគោលដៅស្តុបបុរីអង្គរ ត្រូវបានការិយាល័យនគរបាលចរាចរណ៍ផ្លូវគោកកោះហៅមកសួរនាំបំភ្លឺដើម្បីរងចាំការស្រាវជ្រាវបន្ថែមទៀត ពាក់ព័ន្ធករណីបានចាប់ឃាត់ម៉ូតូកង់៣ (ផាស់អាប់) បម្រុងផាកពិន័យដោយមិនបានល្មើសច្បាប់ចរាចរណ៍ផ្លូវគោក នៅថ្ងៃទី២៤ ខែសីហា ឆ្នាំ២០២៤។ ការកោះហៅប្រធានគោលដៅមកបំភ្លឺ ធ្វើឡើងតាមបទបញ្ជារបស់លោកជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ។
បើតាមស្នងការដ្ឋាននគរបាលរាជធានីភ្នំពេញ គឺនៅល្ងាចថ្ងៃទី២៤ ខែសីហា ឆ្នាំ២០២៤ ប្រធានគោលដៅអនុវត្តច្បាប់ចរាចរណ៍ផ្លូវគោកម្នាក់ នៅគោលដៅស្តុបបុរីអង្គរ ត្រូវបានការិយាល័យនគរបាលចរាចរណ៍ផ្លូវគោកកោះហៅមកសួរនាំបំភ្លឺ ដើម្បីរងចាំការស្រាវជ្រាវបន្ថែមទៀត ក្រោយពីមានការផ្សព្វផ្សាយឃ្លីបវីដេអូតាមបណ្តាញសង្គមពីការចោទប្រកាន់របស់បុរសម្នាក់ជាអ្នកបើកបរម៉ូតូកង់៣ (ផាស់អាប់)ចំពោះមន្រ្តីនគរបាលចរាចរណ៍នៅគោលដៅស្តុបបុរីអង្គរ កាលពីថ្ងៃទី២៤ខែសីហាថា បានចាប់ឃាត់ម៉ូតូកង់៣គាត់បម្រុងផាកពិន័យដោយមិនបានល្មើសច្បាប់ចរាចរណ៍ផ្លូវគោក។ នៅពេលនោះគាត់បានតវ៉ាបង្ហាញកាមេរ៉ា ទើបមន្រ្តីនគរបាលចរាចរណ៍មិនផាកពិន័យនិងបានអនុញ្ញាតឱ្យគាត់បន្តដំណើរ។
ការិយាល័យនគរបាលចរាចរណ៍ផ្លូវគោក បានសូមឱ្យអ្នកបើកបរម៉ូតូកង់៣(ផាស់អាប់) ចូលមកសហការបំភ្លឺជុំវិញករណីនេះដើម្បីដោះស្រាយ ក្រោយពីបានកោះហៅប្រធានគោលដៅអនុវត្តច្បាប់ចរាចរណ៍ផ្លូវគោកម្នាក់ នៅគោលដៅស្តុបបុរីអង្គរមកបំភ្លឺរួចរាល់។
ជុំវិញនឹងករណីនេះ ស្នងការដ្ឋាននគរបាលរាជធានីភ្នំពេញ បានណែនាំដល់ប្រជាពលរដ្ឋធ្វើដំណើរក្នុងភូមិសាស្រ្តរាជធានីភ្នំពេញ មុននឹងផុសព័ត៌មានតាមបណ្តាញសង្គម ក្នុងករណីមន្រ្តីនគរបាលចរាចរណ៍ដែលឈរជើងនៅគោលដៅណាមួយដែលចុះអនុវត្តច្បាប់ចរាចរណ៍ផ្លូវគោក មានកំហុសឆ្គងចំពោះប្រជាពលរដ្ឋដោយប្រការណាមួយ ហើយប្រជាពលរដ្ឋកើតទុក្ខមិនសុខចិត្ត សូមមកដាក់ពាក្យបណ្តឹង នៅស្នងការដ្ឋាននគរបាលរាជធានីភ្នំពេញ លោកអគ្គស្នងការរង និងជាស្នងការនគរបាលរាជធានីភ្នំពេញ នឹងដោះស្រាយជូនប្រជាពលរដ្ឋ៕
