កណ្តាល៖ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលនៅថ្ងៃចន្ទ ទី២៥ ខែកក្កដា ឆ្នាំ២០២២នេះ បានដឹកនាំប្រតិភូស្នងការដ្ឋាន ចូលរួមគោរពវិញ្ញាណក្ខន្ធសព និងបច្ច័យរបស់ស្នងការដ្ឋានចំនួន ១៧,៩១០,០០០រៀល និងនាំយកបច្ច័យដ៏ថ្លៃថ្លារបស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ចំនួន ៥,០០០,០០០រៀល ជូនដល់គ្រួសារសព លោកឧត្តមសេនីយ៍ត្រី រឿន ណារ៉ា អត្តលេខ០២០១០ ស្នងការរងនៃស្នងការដ្ឋាននគរបាលខេត្តកណ្តាល ដែលបានទទួលមរណភាពកាលពីថ្ងៃសៅរ៍ ១០កើត ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៤ ខែកក្កដា ឆ្នាំ២០២២ វេលាម៉ោង១៨:៤៧នាទី ដោយជំងឺគាំងបេះដូង។
ក្នុងឱកាសអញ្ជើញគោរពវិញ្ញាណក្ខន្ធខាងលើនេះ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលបានថ្លែងថា មរណភាពរបស់លោកឧត្តមសេនីយ៍ត្រី រឿន ណារ៉ា គឹជាការបាត់បង់នូវស្វាមី និងឪពុក ជាទីគោរពស្រឡាញ់ ដែលប្រកបដោយព្រហ្មវិហារធម៌ ក៏ដូចជាបាត់បង់នូវវីរជនមួយរូប ដែលបានធ្លាប់លះបង់កម្លាំងកាយចិត្ត និងពេលវេលាបំពញភារកិច្ចលើការងារការពារសន្តិសុខ សណ្តាប់ធ្នាប់ ដែលជាមូលដ្ឋានដ៏ចម្បងក្នុងការអភិវឌ្ឍន៍សង្គមជាតិ។
លោកឧត្តមសេនីយ៍ទោស្នងការនបានបន្តថា មរណភាពរបស់ លោកឧត្តមសេនីយ៍ត្រី រឿន ណារ៉ា ក៏ជាការបាត់បង់នូវពុទ្ធសាសនិកដ៏គំរូដែលតែងតែជួយគាំទ្រដល់ការកសាងហេដ្ឋារចនាសម្ព័ន្ធនានា ទាំងផ្នែកពុទ្ធចក្រ និងអាណាចក្រ សម្រាប់ទុកជាប្រយោជន៍ដល់ប្រជាពលរដ្ឋទូទៅ និងសង្គមជាតិ។
លោកឧត្តមសេនីយ៍ទោ ឈឿន សុចិត្ត បានថ្លែងយ៉ាងដូច្នេះទៀតថា ក្នុងពេលវេលាដ៏សែនក្រៀមក្រំរំជួលចិត្តនេះ យើងខ្ញុំទាំងអស់គ្នា សូមចូលរួមសម្តែងនូវសមានទុក្ខដោយក្តីសោកស្តាយអាឡោះអាល័យ និងសូមបួងសួងឧទ្ទិសដល់គុណបុណ្យព្រះរតនត្រ័យជួយដល់ដួងវិញ្ញាណក្ខន្ធរបស់ លោកឧត្តមសេនីយ៍ត្រី រឿន ណារ៉ា សូមឆាប់បានយោនយកកំណើតចាប់បដិសន្ធិក្នុងសុគតិភពកុំបីឃ្លៀងឃ្លាតឡើយ៕
